Tokio, 1 oktyabr , /AJMEDIA/
Qazaxıstanın müxalif Ümummilli Sosial Demokrat Partiyasının şənbə günü keçirilən növbədənkənar qurultayının iştirakçıları qarşıdan gələn prezident seçkilərində Nurlan Auesbayevin namizədliyini irəli sürüb.
AJMEDIA bu barədə Tengrinews informasiya agentliyinə istinadla xəbər verir.
Nurlan Auesbayev 1957-ci ildə anadan olub və hazırda Qazaxıstanın Ümummilli Sosial-Demokrat Partiyasının paytaxt şöbəsinə rəhbərlik edir.
Bir gün əvvəl, sentyabrın 30-da “Auıl” Xalq Demokratik Vətənpərvərlər Partiyası milli sahibkarlar palatasının aqrar-sənaye kompleksi komitəsinin sədri vəzifəsində çalışan Jiquli Dayrabayevin prezidentliyə namizədliyini irəli sürüb.
Hakim “Amanat” partiyasının, həmçinin parlamentdə təmsil olunan “Ak Jol” Demokrat Partiyasının və Qazaxıstan Xalq Partiyasının növbədənkənar qurultayları isə oktyabrın 6-na təyin edilib. Bəzi yerli müşahidəçilər hər üç partiyanın yeganə namizədinin hazırkı dövlət başçısı Kasım-Jomart Tokayevin ola biləcəyini istisna etmirlər.
Qazaxıstanda növbədənkənar prezident seçkiləri noyabrın 20-nə təyin edilib. Qanunvericiliyə görə, namizədlər respublikanın ictimai birlikləri tərəfindən irəli sürülür. Sentyabrın 23-də başlayan bu prosedur oktyabrın 11-dək davam edəcək. Namizədlərin qeydiyyatı oktyabrın 21-də başa çatacaq.
