Tokio, 7 fevral , /AJMEDIA/
Bu gün Pakistanın Bəlucistan əyalətində Milli Assambleya (parlamentin aşağı palatası) üzvlüyünə namizədlərin ofisləri yaxınlığında iki partlayış törədilib.
AJMEDIA Geo TV telekanalına istinadla xəbər verir ki, terror aktları nəticəsində azı 27 nəfər ölüb, 40-dan çox insan yaralanıb, onlardan bəzilərinin vəziyyəti ağırdır.
Müstəqil namizədlərdən birinin ofisi yaxınlığında partlayıcı qurğunun işə düşməsi 15 nəfərin ölümü ilə nəticələnib, 30-dan çox insan yaralanıb. Daha 12 nəfər isə ikinci terror aktının qurbanı olub.
Parlament seçkiləri ərəfəsində Pakistanda zorakılıq halları daha da artıb. Dünən Xalq Partiyasının namizədi Seyid Zülfiqar Əli Şah silahlı hücuma məruz qalıb. Fevralın 5-də Pakistanın şimal-qərbində silahlıların polis məntəqəsinə hücumu nəticəsində hüquq-mühafizə orqanlarının 10 əməkdaşı həlak olub. Yanvarın 31-də Hayber-Paxtunxva əyalətində müstəqil namizəd Rehan Zeb Xan güllələnib. Yanvarın 30-da Pakistan Xalq Partiyasının iki nümayəndəsinə hücum edilib. Həmin gün Ədalət Uğrunda Hərəkat partiyasının mitinqində baş verən partlayışda 4 nəfər ölüb.
Pakistan Milli Assambleyasına və əyalətlərin qanunvericilik orqanlarına seçkilər fevralın 8-də keçiriləcək. Seçkilərdə ən perspektivli siyasi qüvvələr Pakistan Müsəlman Liqası (Nəvaz fraksiyası) və Pakistan Xalq Partiyasıdır.
