Tokio, 25 dekabr, /AJMEDIA/
Dekabrın 27-də Vyanada İranla bağlanmış beynəlxalq nüvə sazişinin bərpası üçün danışıqlar davam etdiriləcək.
AJMEDIA xəbər verir ki, bu barədə məlumatı Rusiya və Avropa İttifaqı diplomatları təsdiqləyiblər.
Rusiyanın Vyanadakı beynəlxalq təşkilatlar yanında daimi nümayəndəsi Mixail Ulyanov sosial şəbəkələrdəki paylaşımında qeyd edib ki, adətən Milad və Yeni il bayramları vaxtı ciddi danışıqların aparılması sevilmir. Lakin bu xüsusi halda danışıqların keçirilməsi tərəfdaşların vaxt itirmək istəmədiklərinə və sazişi qısa zamanda bərpa etməyə çalışdıqlarına dəlalət edir.
Avropa İttifaqının Xarici Siyasət Xidmətindən bildirilib ki, gələn həftə baş tutacaq danışıqlarda Çin, Fransa, Almaniya, Rusiya, Böyük Britaniya və İran təmsilçiləri iştirak edəcəklər. 2018-ci ildə sazişi birtərəfli qaydada tərk edən ABŞ danışıqlarda birbaşa iştirak etmir və İranla təmasları dayandırıb.
İran tərəfi isə danışıqların davamından böyük gözləntilərinin olmadığını bəyan edib. Bildirilib ki, avropalı iştirakçılar heç bir yeni praktiki təşəbbüs təqdim etməyiblər, onların mövqeyi qismən qeyri-konstruktiv olaraq qalıb. Xüsusilə Fransanın yanaşması sərt tənqid olunub və bütün sanksiyaların ləğv edilməsi tələb olunub.
