Tokio, 18 mart , /AJMEDIA/
İndoneziyada dünyanın ən aktiv vulkanlarından biri olan Merapi püskürüb.
AJMEDIA xarici KİV-lərə istinadla xəbər verir ki, kraterdən axan alovlu lava və 1300 metr hündürlükdə havaya qalxan isti bulud dumanının görüntüləri Merapi Vulkan rəsədxanası tərəfindən qeydə alınıb.
Hazırda vulkanın püskürməsi davam edir. “Sakinlər Merapi vulkanının püskürməsi nəticəsində yaranan vulkanik külün ətrafa səpələnməsinin dayanmasını gözləməli və xüsusən, Merapi ətrafında yağış yağdıqda, vulkanik sel təhlükəsinə qarşı ehtiyatlı olmalıdır”, -deyə bu ölkənin Vulkanologiya Agentliyinin şənbə günü yaydığı bəyanatda bildirilib.
Merapi vulkanı keçən həftə də püskürərək vulkanik materialı dağın zirvəsindən 3000 metr yüksəkliyə qaldırıb. Vulkanik kül yağışı keçən həftə baş verən püskürmədən sonra yaxınlıqdakı ən az səkkiz kəndi bürüyüb. Vulkanoloqlar keçən həftə vulkanın 2021-ci ildən bəri ən aktiv fazasına daxil olduğunu bildiriblər.
Merapi 2020-ci ildən bəri vulkanik aktivliyin artması və səlahiyyətlilərin dağın zirvəsindən 7 kilometr məsafədə məhdudlaşdırılmış zona yaratmasından sonra ikinci ən yüksək səviyyəli xəbərdarlıq səviyyəsindədir. Bu vulkanın sonuncu böyük püskürməsi 2010-cu ildə 300-dən çox insanın ölümünə və 280 min sakinin təxliyə edilməsinə səbəb olub. Bu, təxminən 1300 insanın öldüyü 1930-cu ildən bəri Merapinin ən güclü püskürməsi idi. 1994-cü ildə isə vulkan püskürməsi 60-a yaxın insanın ölümünə səbəb olub.
