Tokio, 11 fevral , /AJMEDIA/
Rusiya mart ayında gündəlik neft hasilatını 500 min barel azaldacağını bildirdikdən sonra OPEK+ ölkələri birliyin plandankənar görüş keçirilməsi məsələsini müzakirə etmirlər.
AJMEDIA-nın məlumatına görə, bu barədə nümayəndəliklərin birindəki mənbə bildirib.
“Xeyr, müzakirə edilmir”, – sualı cavablandıran müsahib bildirib.
Bundan əvvəl Rusiya Federasiyası hökuməti sədrinin müavini Aleksandr Novak Rusiyanın mart ayında gündəlik neft hasilatını 500 min barel azaldacağını bildirib. Onun sözlərinə görə, bu qərar könüllüdür və heç kimlə məşvərət aparılmayıb.
Novakın nümayəndəsi hasilatın azaldılmasının ancaq neftlə bağlı olacağına və qaz kondensatının nəzərə alınmayacağına aydınlıq gətirib. Mənbə həmçinin hasilatın azaldılmasının Rusiyanın OPEK+ sazişi çərçivəsindəki normasından deyil, real istehsal səviyyəsindən hesablanacağını qeyd edib. Sazişə əsasən Rusiya üçün neft hasilatı 2022-ci ilin noyabr ayından gündəlik 10,478 milyon barel səviyyəsində müəyyən edilib. Novakın dediyinə görə, 2023-cü ilin yanvarında Rusiyada gündəlik təqribən 9,8-9,9 milyon barel neft hasil olunub.
