Tokio, 6 Oktyabr, /AJMEDIA/
AMEA-nın Nizami Gəncəvi adına Ədəbiyyat İnstitutunda görkəmli ədəbiyyatşünas-alim, filologiya elmləri doktoru, professor Abbas Zamanovun anadan olmasının 110 illiyinə həsr edilmiş elmi sessiya keçirilib.
Bu barədə AJMEDIA-ya AMEA-dan bildirilib. Qeyd olunub ki, tədbirdə çıxış edən AMEA-nın vitse-prezidenti, Nizami Gəncəvi adına Ədəbiyyat İnstitutunun baş direktoru akademik İsa Həbibbəyli Abbas Zamanovun yubileyinin keçirilməsi ilə bağlı həm Humanitar Elmlər Bölməsinin, həm də institutun Elmi şurasının qərarı olduğunu bildirib. Abbas Zamanovu böyük tədqiqatçı, mükəmməl ədəbiyyat tarixçisi kimi xarakterizə edən akademik vurğulayıb ki, o, mənbəşünas alimdir, arxivlərdə işləyib, yazıçıların məzarını axtarıb tapıb və onun Sabir, Mirzə Cəlil haqqında yazdığı elmi əsərlər bu gün də istinad mənbəyidir. Onun yazılarında ideologiyanın olmadığı, sovet dövrünü təbliğ etmədiyi və vətəndaşlıq mövqeyinin çox güclü olduğu diqqətə çatdırılıb. Milli Azərbaycan Ədəbiyyatı Muzeyinin baş direktoru akademik Rəfael Hüseynov “Azərbaycan diasporu quruculuğunda Abbas Zamanovun rolu” mövzusunda məruzə ilə çıxış edib. O qeyd edib ki, Abbas Zamanov çətin həyat yolu keçsə də, heç zaman şikayətlənməyib, gördüyü bütün işləri vicdanının hökmü ilə həyata keçirib.
R.Hüseynov vurğulayıb ki, Abbas Zamanov 1968-ci ildən Milli Azərbaycan Ədəbiyyatı Muzeyinə direktor təyin edilib və o illərdən, demək olar ki, diaspor yönündə işlər görməyə başlayıb.
Tədbirdə çıxış edən filologiya elmləri doktoru professor Qəzənfər Paşayev “Abbas Zamanov və beynəlxalq əlaqələr” mövzusunda məruzə ilə çıxış edib. Vurğulayıb ki, Abbas Zamanov bir çox ədəbi əlaqələrin qurulması ilə sistemli şəkildə məşğul olub.
Sonra filologiya elmləri doktorları professorlar Şirindil Alışanlı “Klassik ədəbi irs Abbas Zamanovun araşdırmalarında” və Tahirə Məmməd “Milli kimlik uğrunda ziyalı mübarizəsi” mövzularında məruzə ediblər.
Abbas Zamanovun nəvəsi, filologiya üzrə fəlsəfə doktoru dosent Gülgün Əliyeva “Yaddaşlardan silinməyən alim” adlı məruzə edib, ailəsi adından elmi sessiyanın təşkilatçılarına və iştirakçılarına təşəkkürünü çatdırıb.
