Tokio, 13 noyabr , /AJMEDIA/
Əmək və Əhalinin Sosial Müdafiəsi Nazirliyində ölkəmizdə səfərdə olan Türkiyənin hərbiyönümlü QHT rəhbərləri – Türkiyə Ehtiyatda olan Zabitlər Birliyinin sədri, ehtiyatda olan general-polkovnik Erdoğan Karakuş, Türkiyə Ehtiyatda olan Gizirlər Birliyinin sədri Hamza Dürgen, Türkiyə Müharibə Veteranları Birliyinin sədri Beyazıt Yumuk, Türkiyə Müharibə Əlilləri, Şəhid, Dul və Yetimləri Birliyi sədri Mustafa Işık və müharibə veteranları ilə görüş olub.
Əmək və əhalinin sosial müdafiəsi naziri Sahil Babayev Azərbaycanla Türkiyə arasında dostluq və qardaşlıq münasibətlərinin iki qardaş ölkənin dövlət başçılarının birgə səyləri nəticəsində bütün sahələrdə uğurla inkişaf etdiyini vurğulayıb.
Nazirliyin İctimaiyyətlə əlaqələr şöbəsindən AJMEDIA-ya verilən məlumata görə, o, Prezident, Müzəffər Ali Baş Komandan İlham Əliyevin rəhbərliyi ilə Azərbaycan Milli Ordusunun 44 günlük Vətən müharibəsində əldə etdiyi tarixi Zəfərdən bəhs edib, müharibə zamanı qardaş Türkiyənin Azərbaycana siyasi və mənəvi dəstək verməsinin ölkəmizdə yüksək qiymətləndirildiyini bildirib. Nazir 2021-ci il iyunun 15-də imzalanan Şuşa Bəyannaməsi ilə Azərbaycan və Türkiyə arasında əlaqələrin müttəfiqlik səviyyəsinə yüksəldiyini diqqətə çatdırıb.
Türkiyə ilə əmək, məşğulluq və sosial müdafiə sahəsində də əlaqələrin, bu sahədə qardaş ölkənin müvafiq qurumları ilə əməkdaşlıq gündəliyinin daim genişlənməkdə olduğu qeyd edilib.
Görüş iştirakçılarına işğaldan azad olunmuş bölgələrimizdə aparılan quruculuq işləri, postmüharibə dövründə şəhid ailələri və müharibə iştirakçıları ilə bağlı həyata keçirilən sosial dəstək tədbirləri barədə məlumat verilib. Həmin tədbirlər çərçivəsində şəhid ailələri və müharibə iştirakçılarından ibarət 119 min şəxsə sosial dəstəkyönümlü 249 min xidmət göstərildiyi bildirilib.
Nazirliyin vətəndaş cəmiyyəti institutları, hərbiyönümlü QHT-lərlə əməkdaşlıq təcrübəsindən də bəhs olunub.
E.Karakuş, H.Dürgen və digərləri çıxış edərək Azərbaycanın iki il əvvəl Vətən müharibəsində əldə etdiyi möhtəşəm Zəfərdən qürur duyduqlarını vurğulayıblar. Onlar iki qardaş ölkənin daim bir-birinin yanında olmasının, Şuşa Bəyannaməsi ilə ölkələrimiz arasında əlaqələrin müttəfiqlik səviyyəsinə yüksəlməsinin iftixar doğurduğunu ifadə ediblər.
Görüşdə şəhid ailələri və müharibə iştirakçılarının sosial müdafiəsi, iki ölkənin veteran təşkilatları arasında da əməkdaşlığın inkişafı, veteran təşkilatlarının gənc nəslin vətənpərvərlik ruhunda tərbiyəsində gördüyü işlərə dair fikir mübadiləsi aparılıb.
