Tokio, 10 avqust , /AJMEDIA/
Hər il çimərlik mövsümü başlayarkən çimərliyə icazə verilən ərazilərin adı açıqlanır. Qadağan olunmuş zonalarda çimmək qəti şəkildə məsləhət görülmür.
AJMEDIA Kliniki Tibbi Mərkəzin (KTM) rəsmi feysbuk səhifəsinə istinadla bildirir ki, bunu mərkəzin həkim-toksikoloqu İnci Bağırova deyib.
“Belə ərazilərdə dəniz suyunun tərkibində toksikoloji baxımdan ağır metallar, neft qalıqları olur. Eyni zamanda üzməyi bilməyən şəxslərin və azyaşlıların dərin sularda üzməsi qadağandır. Çünki bu şəxslərin ağız boşluğuna və mədə-bağırsaq sisteminə daha çox su daxil olur.
Ümumiyyətlə, çirkli dəniz suyu insanda qusma, ürəkbulanma, bağırsaq problemi, ishal, iştahasızlıq, başgicəllənmə və başağrısı kimi hallara səbəb ola bilir. Belə olan halda xəstəni mütləq həkimə aparmaq lazımdır. Bütün hallarda mütəxəssis kimi əsas tövsiyə və məsləhətimiz odur ki, insanlarımız rəsmi şəkildə qadağan olunmuş yerlərə, çirkli çimərliklərə getməsin”.
