Tokio, 2 Noyabr, /AJMEDIA/
Yaponiya parlamentinin yeni hökumətin tərkibini təsdiq edəcək növbəti sessiyası noyabrın 10-da keçiriləcək.
AJMEDIA xəbər verir ki, bu barədə Kyodo agentliyi etibarlı mənbələrə istinadla məlumat yayıb. Bildirilir ki, parlamentin aşağı palatasına keçirilən seçkilərdən sonra sessiyanın çağırılması barədə razılaşma hakim Liberal Demokratik Partiya (LDP) ilə onun koalisiya tərəfdaşı Komeyto Partiyası arasında əldə edilib.
Sessiyada hakim koalisiyanın koronavirus pandemiyasına qarşı strategiyanı və iqtisadiyyatın bərpası ilə bağlı tədbirləri müzakirəyə çıxaracağı gözlənilir. Bununla yanaşı, sessiya zamanı Baş nazir Fumio Kişida formal olaraq yenidən hökumətin başçısı seçiləcək.
Yaponiya qanunvericiliyinə əsasən, parlamentin sessiyası hər iki palatanın rəhbərliyinin fraksiya rəhbərləri ilə əldə etdiyi razılaşmaya əsasən çağırılır. Bu zaman hakim koalisiyaya aid olan LDP və Komeyto partiyalarının mövqeyi əsas götürülür.
Xatırladaq ki, Yaponiya parlamentinin aşağı palatasına oktyabrın 31-də keçirilən seçkilərin nəticəsinə əsasən LDP 465 yerdən 261-ni qazanıb. Komeyto Partiyası isə 32 mandat əldə edib.
Əsas müxalifət partiyası olan Konstitusiyalı Demokratlar Partiyası (KDP) 13 yer itirib və yalnız 96 mandatla kifayətlənməli olub. Noyabrın 2-də KDP-nin lideri Yukio Edano partiya rəhbərliyi ilə görüşdə tutduğu vəzifədən istefa verdiyini bəyan edib.
