Tokio, 29 aprel , /AJMEDIA/
Yaponiyada yaşayan azərbaycanlı alim Xəlil Kələntər Naxçıvan Dövlət Universitetində olub.
Universitetin Televiziya, mətbuat və ictimaiyyətlə əlaqələr bölməsindən AJMEDIA-ya bildirilib ki, ali təhsil ocağında keçirilən görüş zamanı ali təhsil ocağının rektoru Elbrus İsayev professor Xəlil Kələntəri universitetin kollektivi adından salamlayıb, onun elmi fəaliyyəti və nailiyyətləri haqqında məlumat verib. Bildirib ki, professor əvvəlki və yeni nəsil monitorların yaradılmasında əvəzsiz xidmətləri olan alimdir. Bütün dünyada elektronika sahəsində tədris olunan onlarla kitabın, çoxsaylı elmi məqalələrin müəllifi olan Xəlil Kələntər həm də Dünya Azərbaycanlılarının Əlaqələndirmə Şurasının üzvüdür. Rektor nüfuzlu alimin 40 ilə yaxındır ki, Yaponiyada yaşamasına və fəaliyyət göstərməsinə baxmayaraq, öz Vətəni olan Azərbaycanla çox sıx münasibətləri olduğunu qeyd edib.
“Çoxsaylı patent və ixtiraların müəllifi olan Xəlil Kələntərin Yaponiyada yaradılmış və bütün dünyada geniş istifadə olunan texnologiyaların – fotoaparatlar, kameralar, elektron şüa qurğuları, mikrosxemlər, plazma monitorları, maye kristal monitorların hazırlanmasında böyük xidmətlərinin olması olduqca qürurverici hadisədir”,- deyən Elbrus İsayev vurğulayıb ki, alimin elmi və praktiki nailiyyətləri beynəlxalq elm aləmində də yüksək qiymətləndirilir.
Professor Xəlil Kələntər apardığı elmi tədqiqatlar və patentlər haqqında məruzəsini təqdim edib. Maye kristallar və onun perspektivlərindən söz açan Xəlil Kələntər bildirib ki, LED işıqları (maye kristal displeyin arxa fon işıqları) televizor, kompüter və mobil telefonların əsas hissələrindən biridir. Bu texnologiyadan smartfonlar, mobil telefon və kompüterlərdə, həmçinin avtomobillərdə geniş istifadə olunur. O, eyni zamanda, özünün müəllifi olduğu və bütün dünya ölkələrində geniş istifadə olunan “Backlight unit” və “Backligt optics” texnologiyaları barədə məlumat verib. Professor ənənəvi və müasir televizorların arxa fon işıqlarının strukturu, maye kristal ekranlar, 3D dispeleylər və digər ekran texnologiyaları barədə də danışıb. Həmçinin apardığı tədqiqatların nəticələrini, ixtira və patentlərini seminar iştirakçılarının diqqətinə çatdırıb. O, gəns nəslə tövsiyə edib ki, biz kəskin baxışlar və inkişaf etmiş zehinlərlə müasir ölkələrdəki vəziyyəti nəzərdən keçirməli və gələcək işimizi bu istiqamətdə qurmalıyıq.
Rektor professora xatirə plaketi və hədiyyələr təqdim edib. Görüşdə universitetdə qurulacaq Texnoparkda birgə əməkdaşlığa dair razılıq əldə olunub.
Tədbirdə müəllim və tələbələrin sualları cavablandırılıb.
Qeyd edək ki, 1981-ci ildən Yaponiyada yaşayan Xəlil Kələntər Naqoya və Tohoku universitetlərində doktorluq dərəcəsi alıb. Elektronika mühəndisliyi, yeni nəsil ekranların yaradılması sahəsində 100-ə yaxın patentin, yapon dilində altı kitabın, 130-dan artıq elmi məqalənin müəllifidir. Əsərləri ingilis, yapon, Çin və Koreya dillərində dərc olunub. Yalnız Yaponiyada deyil, Amerika, Asiya və Avropada elektronika, yeni nəsil displey ekranlar sahəsində böyük mütəxəssis kimi tanınır. Həmin sahədə uzun müddət çalışdığına görə Xəlil Kələntərə müvafiq beynəlxalq konfranslarda Yaponiyanı təmsil etmək hüququ verilib.
