Tokio, 16 mart , /AJMEDIA/
Azərbaycanın mühüm əhəmiyyətli beynəlxalq tədbirlərin uğurla keçirilməsində zəngin təcrübəsi var. Artıq işğaldan azad edilmiş Şuşa şəhəri də nüfuzlu beynəlxalq təşkilatların tədbirlərinə ev sahibliyi edir. Bu günlərdə ölkəmiz daha bir əhəmiyyətli tədbiri yüksək səviyyədə təşkil ediib. “Parçalanmış dünyanın bərpası” mövzusunda XI Qlobal Bakı Forumu Davos Dünya İqtisadi Forumu, Münxen Təhlükəsizlik Konfransı kimi aparıcı beynəlxalq forumlarla bir cərgədədir. Forum iştirakçılarının sayının rekord həddə olması da bundan xəbər verir. XI Forumda 68 ölkədən 400-dən çox qonaq iştirak edib. Qonaqların arasında 40-dan çox hazırkı və sabiq dövlət və hökumət başçılarının olması forumun mühüm əhəmiyyət kəsb etməsinə və nəhəng intellektual potensialına dəlalət edir. Nizami Gəncəvi Beynəlxalq Mərkəzinin potensialı, iştirakçıların nüfuzlu siyasi xadim olmaları hər il Bakıda keçirilən müzakirələrin müxtəlif mühüm beynəlxalq məsələləri daha yaxşı anlamağa imkan verir.
Prezident İlham Əliyevin Bakıda keçirilən “Parçalanmış dünyanın bərpası” mövzusunda XI Qlobal Bakı Forumundakı çıxışı da dünya birliyinin diqqət mərkəzindədir. Dövlət başçımızın çıxışının bəzi məqamları xüsusi olaraq diqqətə çatdırılıb. Prezident İlham Əliyevin çıxışı Rusiya mediası tərəfindən də geniş işıqlandırılıb. Prezident İlham Əliyevin Azərbaycanın Qarabağ məsələsi öz həllini tapdıqdan sonra sülh prosesini davam etdirməyə hazır olması və indi regionda düşmənçiliyə son qoymaq vaxtının yetişməsi barədə dediklərini oxuculara çatdırılıb.
Eyni zamanda, Bakı Qlobal Forumu yüksək əhəmiyyət kəsb edən məsələlərin həlli üçün bu gün dünyanın, həqiqətən, Nizami Gəncəvi Beynəlxalq Mərkəzinin üzvlərinin və iştirakçılarının təcrübəsinə, biliyinə, onların dövlət, hökumət başçıları və xarici işlər nazirləri kimi təcrübəsinə ehtiyacı var. Məlumdur ki, bu gün sürətlə dəyişən dünyada qeyri-sabitlik və qarşıdurma ocaqları meydana çıxır. Bu baxımdan forum böyük əhəmiyyətə malikdir. Regionumuzdakı dəyişikliklərdən söhbət düşdükdə qeyd edilib ki, bir il bundan əvvəl burada ötən görüşlərdən bu yana baş verən əsas geosiyasi dəyişiklik Azərbaycanın ərazi bütövlüyü və suverenliyinin tam bərpasıdır. Dövlətimizin başçısı bir daha diqqətə çatdırıb ki, uzun illər ərzində münaqişənin sülh yolu ilə həllini tapmaq üçün fəaliyyət göstərdik. İkinci Qarabağ müharibəsindən əvvəl hər il ədalətsizlik, işğal, beynəlxalq hüququn pozulması, BMT Təhlükəsizlik Şurasının qətnamələrinə əməl olunmaması barədə danışmağa davam edirdik, çünki bu məsələnin beynəlxalq ictimaiyyətin diqqət mərkəzində olmasını istəyirdik. Münaqişənin nizamlanmasında vasitəçilik missiyasını üzərinə götürmüş ATƏT-in Minsk qrupu 28 il ərzində heç bir irəliləyişə nail ola bilmədi. Forum iştirakçılarına da bəlli oldu ki, Minsk qrupunun əsas məqsədi münaqişəni nizamlamaq yox, onu dondurmaq, Ermənistanın Azərbaycan ərazisinin 20 faizinin işğalını əbədi etmək imiş. Dünyanın aparıcı paytaxtlarından ölkəmizə mütəmadi olaraq göndərilən başqa bir mesaj da var idi. Bu da münaqişənin, guya, hərbi yolla həllinin olmaması imiş. Əgər alternativ işğalla razılaşmaq, bizim beynəlxalq səviyyədə tanınan ərazilərimizin təqribən 20 faizində separatçı rejimin mövcudluğu ilə razılaşmaqdırsa, bu, bizim razılaşa biləcəyimiz məsələ deyil. Azərbaycan isə bütün maneələrə, təhdid və təzyiqlərə baxmayaraq, münaqişənin hərbi-siyasi yolla həll etdi. İşğalçı Ermənistan üzərində qazanılan tarixi qələbə də faktiki olaraq təsdiqlədi ki, sülhə nail olmaq üçün bəzən hərbi variantdan istifadə Dövlətimizin başçısı mövcud vəziyyətdən də söhbət açıb. Deyib ki, indi biz Ermənistanla heç vaxt olmadığımız qədər sülhə yaxınıq. Cənubi Qafqazın müstəqillik tarixində heç vaxt sülh bu qədər yaxın olmayıb. Bu, İkinci Qarabağ müharibəsinin nəticəsidir. Lakin hələ də ikili standartlar mərəzindən xilas ola bilməyən bəzi riyakar dövlət və beynəlxalq təşkilatlar Ermənistanın sülh müqaviləsi imzalamasına problem yaradır. Məsələn, Fransa. Bu ölkənin İkinci Qarabağ müharibəsinə və antiterror əməliyyatına münasibəti tamamilə qeyri-adekvat oldu. Onlar tərəfindən bu məsələlərin BMT Təhlükəsizlik Şurasına çıxarılmasına və Azərbaycana qarşı sanksiyaların tətbiq edilməsinə beş dəfə cəhd edilib. Beş cəhdin hər biri uğursuz oldu, çünki Təhlükəsizlik Şurasının digər üzvləri bunu dəstəkləmədi. Daha sonra Avropa İttifaqı çərçivəsində Azərbaycana qarşı sanksiyaların tətbiqinə bir neçə cəhd edildi. Həmin cəhdlər də uğursuz oldu. Avropa İttifaqı ölkələrinin əksəriyyəti bunu dəstəkləmədi. Dövlətimizin başçısı Fransada, Azərbaycanın şəhərlərinin biri ilə qardaşlaşmış Evian şəhərində vandalizm aktı barədə də məlumat verdi. Qeyd etdi ki, Azərbaycan şairi Natəvanın heykəli vandalizmə məruz qaldı. Bunu dayandırmaqla bağlı bu ölkədəki səfirliyimiz və digər kanallarla Fransa hakimiyyət orqanlarına, Evian şəhərinin meriyasına müraciətlər edildi. Çünki heykəlin belə bükülmüş vəziyyətdə saxlanılması və hətta bu boyanın yuyulmasına cəhdin göstərilməməsinin özü vandalizm aktıdır. Bir çox hallarda özünü mənəvi lider kimi qələmə verən Fransa kimi bir ölkədə belə hallar qəbuledilməzdir.
Dövlətimizin başçısı qarşıya qoyulan bir sıra mühüm vəzifələr barədə də məlumat verdi. COP29-un Azərbaycanda keçirilməsi Azərbaycanın yaşıl keçidlə bağlı səylərinin qəbul edilməsidir. COP29 bizə onu nümayiş etdirməyə imkan verəcəkdir ki, müstəqil yaşayan və heç kəsdən asılı olmayan bir ölkə uğurla inkişaf edə bilər. Bu, həm də Azərbaycanın son 30 ildə apardığı düzgün siyasəti nümayiş etdirir.
Vüqar Ağayev
