Tokio, 8 iyun , /AJMEDIA/
Naxçıvan Dövlət Universiteti Yaponiyanın çox nüfuzlu Tokay Universiteti ilə yüksək texnologiyalar və kadr mübadiləsi sahələrində əməkdaşlıq edəcək.
AJMEDIA xəbər verir ki, bu barədə razılaşma Naxçıvan Dövlət Universitetinin rektoru Elbrus İsayevin başçılıq etdiyi nümayəndə heyəti ilə Tokay Universitetinin rəhbərliyi arasında Hiratsuka şəhərində keçirilən görüş zamanı əldə edilib. Görüşdə iki universitetin rəhbər heyəti ilə yanaşı, Azərbaycan-Yaponiya Dostluq Mərkəzinin sədri, elektronika sahəsində tanınmış alim Xəlil Kələntər də iştirak edib.
İki dost ölkənin universitetləri arasında əməkdaşlığın yaradılması məqsədilə keçirilən görüşü açan Tokay Universitetinin Mexaniki mühəndislik sistemləri departamentinin rəhbəri professor Yoşio Yamamoto Naxçıvan Dövlət Universitetinin nümayəndə heyətini bu ali təhsil ocağında salamlamaqdan məmnun olduğunu bildirib. Yaponiya Universiteti haqda təqdimatla çıxış edən professor, bu təhsil ocağı barədə qonaqlara ətraflı məlumat verib. Qeyd edib ki, 1942-ci ildə təsis edilmiş universitetin Yaponiyanın 8 şəhərində kampusu var. Həmin kampuslar Şonan, Yoyogi, Takanava, İsehara, Shimizu, Sapporo, Kumamoto və Aso adlanır. Universitetdə 1600-ə yaxın akademik heyət 30 minədək tələbəyə dərs deyir, onlardan 1254-ü əcnəbidir. İsehara şəhərciyi Tokay Universiteti Xəstəxanasının yaxınlığında, Dəniz Elmləri Məktəbi dənizkənarı Şimizuda, Kənd Təsərrüfatı Məktəbi isə milli parka malik olan Asoda yerləşir.
Kampuslardan beşi Yaponiyanın paytaxtı Tokionun da yerləşdiyi Hönşyu adasında, iki kampus Hokkaydoda, sonuncu isə Kyuşu adasındadır.
Universitetdə 61 kafedra, 21 fakültə əsaslı bakalavr məktəbi var və bu səviyyədə olan bütün kurslar yapon dilində tədris olunur. Beynəlxalq tələbələr üçün birillik yapon dili proqramı mövcuddur. Humanitar elmlər üzrə bir sıra kurslar təklif etməklə yanaşı, universitet Yaponiyada “All Nippon Airways” (ANA) aviaşirkəti ilə birgə pilot hazırlığı proqramını həyata keçirən ilk universitetdir.
Universitet, həmçinin Avstriya, Tailand, Cənubi Koreya, Danimarka və ABŞ-ın Havay adaları da daxil olmaqla 35-dən çox ölkədə ofisləri əhatə edən beynəlxalq mübadilə proqramına malikdir.
Universitetin görkəmli məzunları arasında Olimpiya Oyunlarının qızıl medalçısı cüdoçu Yasuhiro Yamaşita, bürünc mükafatçısı sprinter Şingo Suetsugu və “McDonald’s” şirkətinin Yaponiya üzrə prezidenti Eiko Harada var.
Yaponiyanın nüfuzlu universiteti haqqında verilən ətraflı məlumata görə minnətdarlığını bildirən Naxçıvan Dövlət Universitetinin (NDU) rektoru Elbrus İsayev də öz növbəsində rəhbərlik etdiyi ali təhsil ocağı barədə ətraflı məlumat verib. Videomaterialdan istifadə edilərək keçirilən təqdimatda bildirilib ki, NDU-nun əhatə etdiyi 108 hektarlıq ərazidə 13 tədris korpusu, Elektron Kitabxana, Konservatoriya, Sosial Xidmət Mərkəzi, Universitet Xəstəxanası, Olimpiya İdman Mərkəzi, 2 stadion və müasir tipli Tələbə evi yerləşir. Azərbaycan ali təhsil sistemində ilk dəfə olaraq tələbələr üçün 3 mərtəbəli Sosial Xidmət Mərkəzi, müasir tipli universitet Qonaq evi istifadəyə verilib. Bununla yanaşı, Universitet xəstəxanasının fəaliyyəti genişləndirilib və ötən ilin may ayından etibarən xəstəxanada Cərrahiyyə, Laboratoriya və Göz şöbələri də fəaliyyətə başlayıb.
Universitetdə ən yüksək kampus simsiz internet şəbəkəsindən istifadə olunur. Burada 3 internet mərkəzi, Media mərkəzi, Universitet televiziyası (UTV), “Nuhçıxan radiosu”, “Qeyrət” nəşriyyatı, “Elmi əsərlər” jurnalı, “Yeni fikir” qəzeti və bir neçə muzey fəaliyyət göstərir. Universitetin “Elmi əsərlər” jurnalı Ali Attestasiya Komissiyasının reyestrinə daxil edilib və beynəlxalq ISSN nömrəsi alıb. NDU ABŞ, İngiltərə, Çin, Rusiya, Fransa, Almaniya, İspaniya, Cənubi Koreya, Rusiya, Türkiyə, Misir, Pakistan, İran, Özbəkistan və digər ölkələrin ali məktəbləri ilə geniş əlaqələrə malikdir.
Universitet iki dəfə 2015-ci və 2017-ci illərdə, yeni texnologiyaların tətbiqi, tədrisin səviyyəsi, mənimsəmə və davamiyyətə görə Azərbaycan Respublikasının ali məktəblərinin reytinq cədvəlində birinci yerə layiq görülüb.
Tədris prosesini Avropa standartları və Azərbaycan təhsil qanunvericiliyinə uyğun quran NDU Cənubi Koreyanın KOICA təşkilatı ilə birlikdə “Elektron təhsil şəbəkəsi və rəqəmsal multimedia infrastrukturunun yaradılması” layihəsini həyata keçirib. Elektron Universitetin fəaliyyətə başlaması Azərbaycan ali təhsil məkanında büdcəsinə və layihəsinin genişliyinə görə ən irihəcmli və əhəmiyyətli layihələrdən biri kimi tarixə düşüb. Ölkəmizin ali təhsil müəssisələri arasında ilk dəfə Naxçıvan Dövlət Universitetində Distant Təhsil Mərkəzi istifadəyə verilib.
NDU-da 100 minə yaxın kitab fondu olan kitabxanada “PROLİB” avtomatlaşdırılmış Kitabxana-İnformasiya İdarəetmə sistemi vasitəsilə bugünədək 5400 adda 40 min kitabın elektron kataloqu yazılıb, 4500-dən artıq kitabın isə tammətnli elektron versiyası hazırlanaraq oxucuların istifadəsinə verilib.
Tədqiqat universitetinə çevrilmək istiqamətində geniş viziona malik olan Naxçıvan Dövlət Universitetində son illərdə mühüm elmi yeniliklər və elmi tədbirlər silsilə xarakter alıb. Nüfuzlu elmi nəşrlərin dinamikasında əhəmiyyətli irəliləyişlərə nail olunub. Bu sahədə “Veb of Science”, “Clarivate Analytics” şirkətləri ilə qurulan səmərəli əməkdaşlıq əlaqələri elmi mühiti daha da canladırmaqla yanaşı, müasir elmi-metodiki maarifləndirməni tam təmin edib.
Yeni nəsil gəncliyin hərtərəfli inkişafını təmin etmək üçün NDU-da yaradılmış Tələbə Gənclər Təşkilatı, Tələbə Elmi Cəmiyyəti, Tələbə turizm assosiasiyası, Tələbə informasiya mərkəzi, Tələbə teatr və opera studiyaları, xor, vokal və rəqs qrupları, İdman klubu səmərəli fəaliyyət göstərir. Ali təhsil ocağının tələbə təşkilatları universitetdə tələbələrin yaradıcılıq axtarışlarının, bilik və bacarıqlarının, dünyagörüşünün, təşkilatçılıq qabiliyyətlərinin daha da inkişaf etdirmələrinə, asudə vaxtlarının səmərəli təşkilinə geniş imkan yaradır.
Naxçıvan Dövlət Universitetinin rektoru Elbrus İsayev beynəlxalq əlaqələrin inkişaf istiqamətlərini vurğulayaraq qeyd edib ki, hazırda universitetin 130 ölkənin 150-dən artıq universiteti ilə geniş əlaqələrə malikdir. Hazırda bu universitetlərlə akademik, tələbə mobilliyi proqramları, birgə elmi araşdırmalar və ikili diplom proqramları üzrə fəal əməkdaşlıq qurulur. Universitet əcnəbi tələbələrin təhsilinə görə ölkədə lider universitetlərdən sayılır. Hazırda dünyanın 10 ölkəsindən 1500 əcnəbi tələbə müxtəlif proqramlar üzrə təhsillərini davam etdirir. Naxçıvan Dövlət Universiteti Erasmus proqramı üzrə fəal əməkdaşlıq əlaqələrinə malikdir. Universitet Avrasiya Universitetlər Birliyi, Avropa Rektorlar Klubu, Qara Dəniz Universitetlər Şəbəkəsi, İpək yolu Universitetləri Cəmiyyətinin üzvüdür.
Naxçıvan Dövlət Universiteti Beynəlxalq reytinq şirkətləri olan “Times High Education” və QS şirkətləri ilə geniş əlaqələrə malikdir. Xüsusilə 2020-ci ildən etibarən “Times High Education” şirkəti ilə dinamik əməkdaşlıq öz nəticəsini verib, NDU bu nüfuzlu təşkilatın sıralamalarında əhəmiyyətli dərəcədə irəliləyərək 1001+ da yer alıb. Bu gün bu təşkilatın dəvəti ilə Naxçıvan Dövlət Universiteti Yaponiyanın Aici şəhərində keçirilən nüfuzlu universitetlərin Asiya Sammitində iştirak edir.
Təqdimat görüş iştirakçıları tərəfindən böyük maraqla qarşılanıb və verilən suallar rektor tərəfindən ətraflı cavablandırılıb.
Təqdimatlardan sonra tərəflər arasında aparılan müzakirələrin nəticəsi olaraq NDU əməkdaşlarının bir tədris ili ucun Tokay Universitetində bu ali təhsil ocağının imkanları hesabına laboratoriya fəaliyyəti ilə məşğul olmaları, doktorantura sonrası (PosDoc) hər təqvim ilində azı 10 əməkdaşın qarşılıqlı mübadiləsi, mühəndislik sahəsində Tokay təqaüdü ilə NDU-nun əməkdaşının bu universitetdə doktorantura oxuması, Mikro-Nano Texnologiya Mərkəzinin NDU Texnoparkının dizaynında avadanlığın seçilməsi və coğrafi ehtiyaclarin müəyyənləşdirilməsinə dəstək göstərilməsi barədə razılıq əldə edilib.
Sonra xatirə fotosu çəkdirilib.
Görüşdən sonra Tokay Universitetində fəaliyyət göstərən müxtəlif istiqamətli laboratoriyalar və kabinələrlə tanış olan azərbaycanlı qonaqlara burada aparılan elmi tədqiqatların istiqamətləri, həyata keçirilən layihələr barədə ətraflı məlumat verilib. NDU-nun nümayəndə heyəti Mikro-Nano Texnologiya Mərkəzinin Mikropartukulyar laboratoriyası, Nanotədqiqatlar laboratoriyası, biokimya laboratoriyası, mikrocisimlərin tədqiqatı laboratoriyası, nanomaterialların MR və rentgen laboratoriyası ilə tanış olublar. Qonaqlara bu laboratoriyalarda istifadə edilən avadanlıq, aparılan elmi-tədqiqatların istiqamətləri, gənc tədqiqatçıların yetişdirilməsi barədə də məlumatlar verilib. Nümayəndə heyəti universitetin tədris kompleksində dərs prosesini də izləyib.
Tokay Universitetinin Optik Təsvir Elmləri və Texnologiyaları Departamentinin professoru Şuiçi Maeda NDU-nun nümayəndə heyətinin Tokay Universitetinə gəlməsi, aparılan danışıqları və qarşılıqlı əməkdaşlığın gələcək perspektivləri barədə fikirlərini AZƏRTAC-ın Yaponiyadakı xüsusi müxbiri ilə bölüşüb. Yapon professor deyib: “Azərbaycan universitetinin rektoruna və Tokay Universitetini ziyarət edən hər kəsə təşəkkür edirik. Bizim üçün Azərbaycandan gələn qonaqları universitetimizdə salamlamaq çox xoşdur. Qonaqların universitetimizə göstərdiyi böyük maraq, əməkdaşlıq niyyəti xoş təsir bağışladı. Naxçıvan Dövlət Universiteti haqqında təqdimatı isə çox bəyəndik. Yüksək səviyyəli ali təhsil ocağı olmasının şahidi olduq.
Düşünürəm ki, universitetlərimiz arasında qurulacaq əməkdaşlıq, təhsil və elmi-tədqiqatlar sahəsində birgə fəaliyyət və kadr mübadiləsi hər iki tərəf üçün faydalı olacaq. Təbii ki, güc birlikdədir və bu bizə yeni uğurlar qazandıra bilər. Bu gün aparılan müzakirələr və razılaşmalar isə əldə edilən ən böyük nəticədir. Bununla biz qarşılıqlı səfərlərin, birgə əməkdaşlığın və birgə yaşayışın əsaslarını qoyduq. Bu həm də bizim dostluğumuzun əsası qoyulan gün oldu.
Deyə bilərəm ki, bu, yalnız universitetlər arasında deyil, həm də xalqlarımız arasında dostluq və əməkdaşlıq əlaqələrinin inkişafına böyük təsir göstərəcək. Bir-birimizi daha yaxından öyrənməyə şərait yaradacaq.
Bu gün Azərbaycanın Naxçıvan Muxtar Respublikasından gələn qonaqlarla görüşdən çox məmnun oldum. Buna görə dostum, professor Xəlil Kələntərə minnətdarlığımı bildirəm. Qonaqlara isə yalnız uğurlar arzulayıram”.
