Tokio, 12 may , /AJMEDIA/
“Heydər Əliyev İli” çərçivəsində mayın 12-də Azərbaycan Respublikası Dövlət Neft Şirkətinin (SOCAR) Müşahidə Şurasının üzvü, Azərbaycan Respublikası Dövlət Neft Fondunun (ARDNF) İcraçı direktoru İsrafil Məmmədovun, SOCAR-ın prezidenti Rövşən Nəcəfin və bp-nin Azərbaycan, Gürcüstan və Türkiyə üzrə regional prezidenti Qəri Counzun da olduğu nümayəndə heyəti Heydər Əliyev adına yarımdalma qazma qurğusuna səfər edib.
SOCAR-dan AJMEDIA-ya bildirilib ki, səfər 2017-ci ildə açılışı olan qurğunun təhlükəsiz və səmərəli fəaliyyəti ilə yaxından tanış olmaq, mövcud və perspektiv imkanları müzakirə etmək məqsədi daşıyıb. Nümayəndə heyəti qurğu döşəməsi, boru göyərtəsi, körpü, MPD avadanlıqları və digər obyektlərin mövcud vəziyyətinə yerində baxış keçirib.
Səfər çərçivəsində qazma əməliyyatları üçün ən müasir avadanlıqlarla, o cümlədən böyük həcmdə avtomatik idarəetmə sistemi ilə təchiz edilən və dənizdə suyun 1000 metr dərinliyə qədər hissələrində qazma əməliyyatları həyata keçirə bilən qurğunun cari fəaliyyəti, müasir texnoloji və təhlükəsizlik sistemləri barədə məlumat verilib, burada çalışan mütəxəssislərlə müxtəlif mövzular ətrafında müzakirələr aparılıb, bir sıra əməkdaşa xüsusi səylərinə və töhfələrinə görə təşəkkürnamələr təqdim edilib.
Qazma qurğusunun tikintisinə 2013-cü ilin iyununda SOCAR-ın birgə müəssisəsi olan “Caspian Drilling Company Limited” (CDC) MMC və Sinqapurun “Keppel FELS” şirkətləri arasında podrat müqaviləsi əsasında başlanılıb. Qurğunun inşaat işlərinin idarə edilməsi, layihələndirmə-mühəndislik işlərinə nəzarət, həmçinin təchizatlar və alqı-satqıların təşkil edilməsi CDC şirkəti tərəfindən icra olunub.
