Tokio, 9 oktyabr , /AJMEDIA/
Oktyabrın 9-da Azərbaycanın 18-ci “NETTY2023” Milli İnternet Mükafatı müsabiqəsinə qeydiyyat başlayıb.
AJMEDIA xəbər verir ki, 2004-cü ildə yaradılan NETTY hər il Azərbaycanın ən yaxşı internet saytlarını, tətbiqlərini, sosial resurslarını müəyyənləşdirir və mükafatlandırır.
Müsabiqə iştirakçılarının ərizələri netty.az saytında qəbul olunur və 2023-cü il oktyabrın 9-dan noyabrın 30-dək davam edəcək. Dekabrın 1-dən dekabrın 7-dək namizədlərin siyahısını formalaşdıran Ekspert Şurasının və Virtual Münsiflər Heyətinin səsverməsi keçiriləcək.
Dekabrın 8-də NETTY Akademiyası namizədlər arasından qalibləri müəyyən etmək üçün səsverməyə başlayacaq.
Elan edilmiş əsas nominasiyalar üzrə hər bir kateqoriya üzrə qaliblər müəyyən ediləcək. İştirakçıların qiymətləndirilməsi 3 meyar üzrə aparılır: ideya, məzmun, icra.
NETTY Milli İnternet Mükafatı – Ümumdünya Şəbəkəsinin milli seqmentinin və ümumiyyətlə İT bazarının inkişafı məqsədilə yaradılmış informasiya texnologiyaları sahəsində Azərbaycanın ilk peşəkar mükafatıdır. NETTY hər il Azərbaycanın ən yaxşı veb-saytlarını, mobil tətbiqlərini, sosial resurslarını müəyyənləşdirir və mükafatlandırır.
