Tokio, 28 aprel , /AJMEDIA/
Görkəmli oftalmoloq, akademik Zərifə Əliyevanın 100 illiyi münasibətilə onun adını daşıyan “Ro-Pax” tipli gəminin təsviri əks olunmuş poçt markası hazırlanıb.
“Azərbaycan Xəzər Dəniz Gəmiçiliyi” QSC-dən AJMEDIA-ya bildirilib ki, qurumun təşəbbüsü ilə Rəqəmsal İnkişaf və Nəqliyyat Nazirliyinin tabeliyindəki “Azərpoçt” MMC-nin hazırladığı poçt markası Belarus Respublikasının “Bobruisk İnterated Printing House” çap evində işıq üzü görüb.
Yüksək keyfiyyətlə çap olunmuş poçt markasının ölçüsü 52×37 millimetrdir. Markanın nominal dəyəri 1 AZN-dir.
Bu markanın dövriyyəyə buraxılması dənizçilərin görkəmli oftalmoloqa sonsuz ehtiramının bariz nümunəsi olmaqla yanaşı, dünyada filateliyaya marağın yenidən artdığı bir vaxtda əsl kolleksiyaçılar üçün də böyük töhfədir.
