Tokio, 21 iyun , /AJMEDIA/
Yaponiyaya səfər edən əcnəbi turistlərin sayı may ayında 3,04 milyon nəfər təşkil edib ki, bu da bir il əvvələ nisbətən 60,1 faiz çoxdur və ardıcıl olaraq üç ay ərzində 3 milyon nəfəri ötüb. Buna zəif yen səbəb olub.
AJMEDIA xarici mediaya istinadla xəbər verir ki, Yaponiyanın Milli Turizm Təşkilatı turistlərin gəlişinin yüksək səviyyəsini Çində tətil mövsümü və Şərqi Asiyadan gələn reyslərin və gəmilərin sayının artması ilə izah edir.
Cənubi Koreya və ABŞ da daxil olmaqla ondan çox ölkə və bölgədən gələn turistlərin sayı bir ayda rekord həddə çatıb.
Məlumata görə, yanvar-may aylarında ziyarətçilərin ümumi sayı 14,64 milyon nəfər təşkil edib ki, bu da 2019-cu ilin koronavirus pandemiyasından əvvəl eyni dövrü ilə müqayisədə 6,5 faiz çoxdur.
Ölkələrə və bölgələrə görə ən çox turist Cənubi Koreyadan gəlib – 738 800 nəfər, bu isə bir il əvvələ nisbətən 43,3 faiz və 2019-cu ilə nisbətən 22,4 faiz çoxdur. Daha sonra Çindən gələn turistlər yer alıb – 545 400 nəfər, bu da əvvəlki ilə nisbətən təxminən dörd dəfə çoxdur, lakin yenə də 2019-cu il ilə müqayisədə 27,9 faiz azdır.
Təşkilatın ilkin məlumatına görə, Tayvan üçüncü yerdədir – 466 000 nəfər, bu da əvvəlki ilə nisbətən 53,6 faiz, 2019-cu il ilə müqayisədə 9,3 faiz çoxdur. ABŞ-dan gələn turistlərin sayı isə 247 min nəfər təşkil edib ki, bu da əvvəlki ilə nisbətən 34,7 faiz, 2019-cu ilin may ayına nisbətən 57,4 faiz çoxdur.
Turistlərin ümumi sayında artım tempi davam edərsə, 2019-cu ildə qeydə alınan 31,88 milyon nəfərlik illik rekordu üstələyə bilər.
