Tokio, 1 sentyabr, /AJMEDIA/
Uzun müddətdir Mərkəzi Asiya ölkələrində Azərbaycanın mədəniyyətini, tarixini, o cümlədən Ümummilli Lider Heydər Əliyevin böyük irsini yorulmadan təbliğ edən Türkdilli Dövlətlərin Siyasətinə Dəstək Fondunun Bişkekdəki prezidenti Nüsrət Məmmədov Qırğızıstanın yüksək “Dostuk” ordeni ilə təltif edilib.
AJMEDIA xəbər verir ki, avqustun 31-də Qırğız Respublikasının Prezidenti Sadır Japarov Qara-Qırğız Muxtar Vilayətinin yaradılmasının 100 illiyi və Müstəqillik Günü ilə əlaqədar ölkə və xalq qarşısında müstəsna xidmətlərinə görə ayrı-ayrı şəxslərə Qırğız Respublikasının dövlət mükafatlarını təqdim edib.
Bu, avqustun 30-da Qırğız Respublikası Prezidenti Administrasiyasının yeni “Intımak Ordo” inzibati binasında keçirilən ilk rəsmi tədbir olub.
Təltif olunanların qarşısında çıxış edən dövlət başçısı deyib: “Mükafata layiq görülənlər arasında Türkdilli Dövlətlərin Siyasətinə Dəstək İctimai Fondunun prezidenti Nüsrət Musa oğlu Məmmədov da var. O, türkdilli ölkələrin görkəmli yazıçılarının əsərlərinin nəşrinə və tərcüməsinə xüsusi diqqət yetirir, bu ölkələr arasında qardaşlıq münasibətlərini qoruyur, həmin kitabları xalqımızla təmənnasız olaraq bölüşür”.
Prezident Sadır Japarov Nüsrət Məmmədova yüksək mükafatı şəxsən təqdim edib.
Tədbirin bədii hissəsində Qırğızıstan Respublikasının Xalq artisti adına layiq görülmüş Gülzinət Surançiyeva Heydər Əliyev Fondunun vitse-prezidenti Leyla Əliyevanın sözlərinə bəstələnmiş “İssık-Kul” mahnısını ifa edib.
Mərasimdə iştirak edən Qırğız Respublikası Baş nazirinin mədəniyyət məsələləri üzrə müavini Edil Baysalov müğənninin ifasında səslənən mahnını yüksək qiymətləndirib. Leyla Əliyevanın sözlərinə bəstələnmiş əsərin musiqisinin müəllifi professor Abbasqulu Nəcəfzadədir.
Qeyd edək ki, mahnı KTRK-nın (Qırğızıstan Televiziya və Radio Yayımları Şirkəti) “Qızıl Fondu”na daxil edilib.
