Tokio, 7 iyun , /AJMEDIA/
Moskva və Bakı Azərbaycanda Rusiyanın baş konsulluqlarının yaradılması məsələsini müzakirə ediblər.
AJMEDIA TASS agentliyinə istinadla xəbər verir ki, bunu Rusiya Federasiyası Xarici İşlər Nazirliyi (RF XİN) rəhbərinin müavini Mixail Qaluzin Sankt-Peterburq Beynəlxalq İqtisadi Forumu (PBİF) çərçivəsində təşkil olunan “Rusiya-Azərbaycan” sessiyasında deyib.
“Qeyd etmək istərdim ki, Azərbaycanda baş konsulluqlarımızın yaradılması münasibətlərimizin mütərəqqi inkişafına, o cümlədən ticari-iqtisadi əməkdaşlığın inkişafı üçün yeni imkanlara gözəl zəmin yarada bilər. Biz indi azərbaycanlı dostlarımızla müzakirələr aparırıq və ümid edirik ki, bu məsələ uğurla nəticələnəcək”, – deyə nazir müavini bildirib.
M.Qaluzin vurğulayıb ki, Rusiya-Azərbaycan münasibətləri bu gün çox yaxşı səviyyədədir. “Bu, 2022-ci ilin fevralında imzalanmış bəyannaməyə uyğun olaraq qurulan müttəfiq qarşılıqlı əlaqə və strateji tərəfdaşlıq münasibətləridir”, – o, deyib.
Rusiya XİN rəhbərinin müavini Azərbaycanda rus dilinin öyrənilməsinə də diqqət çəkib. “Dünən Vladimir Vladimiroviç Putin deyib ki, Azərbaycan Prezidentinin rus dilinin öyrənilməsindəki dəstəyini hiss edir, çünki bu, ikitərəfli münasibətlərin inkişafı üçün zəruridir. Bu da bizim birgə işimizin vacib hissəsidir. Biz onu birlikdə həyata keçiririk, burada yeni imkanlar axtarıb tapırıq, bu məsələləri çox fəal şəkildə müzakirə edirik”, – M.Qaluzin qeyd edib.
“Əminəm ki, əgər biz bu yolla getsək, Rusiya-Azərbaycan münasibətlərinin ən uğurlu, etibarlı və praqmatik inkişafı liderlərimizin razılaşmalarına uyğun olaraq fəal şəkildə davam etdiriləcək”, – deyə nazir müavini bildirib.
O, Azərbaycan tərəfinə ölkə ərazisində “Mir” ödəniş kartından istifadə imkanının yaradılmasına görə təşəkkür edib.
“Tədricən Azərbaycanda “Mir” kartının dövriyyəyə buraxılmasını yüksək qiymətləndiririk. Biz bu yanaşmaya görə azərbaycanlı dostlarımıza minnətdarıq. Bu, turizm sahəsində əlaqələrin inkişafına çox kömək edir, rusiyalı turistlər üçün bu, çox vacibdir”, – deyə Rusiya XİN rəhbərinin müavini bildirib.
