Tokio, 14 iyun , /AJMEDIA/
AJMEDIA xəbər verir ki, Milli Qurtuluş Gününün 30 illiyinə həsr olunmuş tədbir keçirildi
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasının Oxuculara xidmət şöbəsi Yasamal rayon Heydər Əliyev Mərkəzində Azərbaycan Xalqının Milli Qurtuluş Gününə həsr olunmuş “Milli Qurtuluş Günü – 30” adlı tədbir keçirdi.
Tədbir Azərbaycan Respublikasının Dövlət himninin səsləndirilməsi ilə başlandı.
Tədbirdə Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərin xatirələri bir dəqiqəlik sükutla yad edildi.
Tədbiri Yasamal rayon MKS-nin direktoru, Fəxri mədəniyyət işçisi Lətifə Məmmədova açaraq 15 iyun – Milli Qurtuluş Günü haqqında danışdı. O, Ulu Öndər Heydər Əliyevin müasir müstəqil Azərbaycanın banisi olduğunu qeyd etdi. L.Məmmədova Ulu Öndər Heydər Əliyevin: “Müstəqilliyin əldə olunması nə qədər çətindirsə, onun saxlanılması, daimi, əbədi olması bundanda çətindir”, – sözlərini qeyd etdi. O həmçinin bildirdi ki, Azərbaycanın dövlət müstəqilliyinin qorunması və möhkəmləndirilməsi Heydər Əliyevin adı ilə bağlıdır.
Tədbirdə yazıçı-publisist Reyhan Mirzəzadə Milli Qurtuluş Gününün tarixinə toxunaraq apardığı araşdırmalarından danışdı. R.Mirzəzadə qeyd etdi: “Türklərin XX əsrdə yetişdirdiyi iki qüdrətli şəxsiyyəti olub: Atatürk və Heydər Əliyev”. O, xalqın daim Heydər Əliyevə inamı olduğunu və xalqın Heydər Əliyevi Azərbaycan xalqının xilaskarı kimi görürdüklərini qeyd edərək vurğuladı ki, Heydər Əliyev ermənilərin Böyük Ermənistan yaratmaq xülyasını puça uğradan böyük şəxsiyyətdir O, H.Əliyevlə bağlı kitab ərsəyə gətirdiyini də qeyd edərək vurğuladı ki, Ümummilli Liderin bacarığını müqayisəli və yüksək səviyyədə yazmağa çalışdım. R.Mirzəzadə bildirdi ki, “Atatürk Anadolu türk dünyası üçün nə qədər qüvvətlidirsə, Heydər Əliyev də Azərbaycan türkləri üçün bir o qədər qüvvətli və qiymətlidir. Onlar əsrlər boyu xalqının, millətinin qəlbində yaşayaqcaq iki böyük şəxsiyyətdir”.
Şair, ictimai xadim Zakir Ağdamlı tədbir iştirakçılarını Milli Qurtuluş Günü münasibətilə təbrik etdi. O qeyd etdi ki, bu gün Azərbaycanın yetişdirdiyi çox nadir şəxsiyyətlərdən, böyük siyasi liderlərdən biri olan Heydər Əliyevin tarixə iz qoyduğu günlərdən biridir. 15 iyun tarixi onun yenidən hakimiyyətə qayıdışı, ölkəni xaotik vəziyyətdən xilas etdiyi gündür.
Yazıçı-publisist, şair, “Elm və təhsil” qəzetinin baş redaktoru, AYB-nin və AJB-nin üzvü Pərixanım Mikayılqızı Azərbaycan tarixinin ağır dövrünü xatırladı. P.Mikayılqızı o günlərdə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan Heydər Əliyevin gördüyü işlərdən danışdı. O, Ulu Öndər Heydər Əliyevə həsr etdiyi “Sən bəşəriyyət üçün Azərbaycansan” şeirini səsləndirdi.
“Dünya Azərbaycanlıları Həmrəyliyi” İctimai Birliyinin sədri Tofiq Əlizadə tədbir iştirakçılarını Milli Qurtuluş Günü münasibətilə təbrik etdi və bildirdi ki, bu gün Azərbaycan xalqının taleyində böyük əhəmiyyət kəsb edən günlərdən biridir. T.Əlizadə Azərbaycanı parçalanmaqdan qurtaran Heydər Əliyevin uzaqgörənliyinə toxunaraq tarixi faktlardan danışdı.
Bədii qiraətçi, sənətşünaslıq üzrə fəlsəfə doktoru Zülfiyyə Eldarqızı çıxış edərək bütün xalqın ürəyinin səsi olan Heydər Əliyevin ölkəmizin taleyindəki böyük rolundan danışdı. O, Zəlimxan Yaqubun “Azərbaycan oxusun” şeirini söylədi.
Şair, “Vedibasar” qəzetinin təsisçisi və baş redaktoru, “Tərəqqi” medallı, AYB-nin və AJB-nin üzvü Nəsibə İsrafilqızı çıxış edərək 15 iyun – Milli Qurtuluş Gününün Azərbaycan xalqını nicata aparan tarixin başlanğıcı olduğunu qeyd etdi. O, Ulu Öndər Heydər Əliyevə həsr etdiyi “Xilaskarım” şeirini söylədi, daha sonra Azərbaycan xalqının Vətənə olan sevgisi “Vətən aşiqləriyik” şeiri ilə ifadə etdi.
Ağa Musa Nağıyev adına “Milli Dəyərlərin Qorunması” İctimai Birliyinin sədri, tarix üzrə fəlsəfə doktoru, “Tərəqqi” medallı Dilarə Nağıyeva-Muxtarova çıxış edərək Milli Qurtuluş Gününün tarixi əhəmiyyətindən danışdı. O bildirdi ki, Ulu Öndər Heydər Əliyevin məqsədi daim Azərbaycan xalqının firəvanlığını təmin etmək olmuşdur. D.Nağıyeva Heydər Əliyevin torpaqlarımıza azadlıq bəxş etdiyini vurğuladı. D.Nağıyeva Yasamal rayon MKS-nin direktoru Lətifə Məmmədovanı Heydər Əliyevin 100 illik yubileyi ilə əlaqədar İB-nın təsis etdiyi “Heydər zirvəsi” diplomu ilə təltif etdi.
“Demokratik Cəmiyyət və Qadın Hüquqlarının Müdafiəsi” İctimai Birliyinin sədri Mehriban Abdullayeva tədbir iştirakçılarını salamladı və bildirdi ki, Ulu Öndər Heydər Əliyevin hakimiyyətə qayıdışından sonra ölkədə baş vermiş sosial-iqtisadi və siyasi inkişaf dövlətimizin möhkəmlənməsində mühüm rol oynadı. O, Milli Qurtuluş Gününün Azərbaycan tarixində qürurverici bir tarix olduğunu qeyd etdi. Ulu Öndərin Azərbaycan xalqını birləşdirmək missiyasını uğurla həyata keçirdiyini vurğuladı.
“Carçı” jurnalının təsisçisi və baş redaktoru, Yasamal rayon Qadınlar Cəmiyyətinin sədri Gülnarə Əmirquliyeva çıxış edərək Heydər Əliyevin fəaliyyətini “Carçı” jurnalının səhifələridə qeyd olunmasının qürurvericiyindən danışdı. G.Əmirquliyeva Ulu Öndərin mədəniyyət və incəsənət xadimlərinə verdiyi dəyərdən söhbət açdı. O, bundan sonrakı fəaliyyətinin Ulu Öndərin qoyduğu irs haqqında materialların hazırlanmasının zəruri olduğunu vurğuladı.
Yazıçı, publisist, “Azərbaycan Yazıçı Qadınlar Cəmiyyəti” İctimai Birliyinin sədri, “Yazıçı qadınlar” jurnalının baş redaktoru, AYB-nin və AJB-nin üzvü Nüşabə Məmmədli tədbir iştirakçılarına Ulu Öndər Heydər haqqında söylədikləri fikirlər üçün təşəkkürünü bildirdi. N.Məmmədli Heydər Əliyevlə görüşlərindən bəhs edərək onun güclü hafizəsindən, hər bir vətəndaşa qarşı göstərdiyi xüsusi diqqətindən danışdı. O, Ulu Öndərin xidmətləri sahəsində həyatın bütün sahələrində tərəqqi və dirçəlişin baş verdiyini vurğuladı.
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə elmləri doktoru, dosent Hüseyn İbrahimov çıxış edərək bildirdi ki, Milli Qurtuluş Günü tarixi əhəmiyyətə malik gündür. Ulu Öndər Heydər Əliyev Azərbaycanı qüdrətli, nüfuzlu, demokratik dövlət kimi görmək istəyirdi, onun hər addım və hərəkətləri məhz buna yönəlmişdi. O, Heydər Əliyevin siyasəti nəticəsində Azərbaycanın xaosdan, anarxiyadan, hərc-mərclikdən, özbaşınalıqdan, parçalanma təhlükəsindən qurtulduğunu söylədi.
Uşaq yazıçısı, şair, AYB-nin və AJB-nin üzvü Gülzar İbrahimova çıxışında Ulu Öndərin insanlara diqqətindən, qayğısından danışdı. O, Heydər Əliyevin xalqını mükəmməl görməsi istəyini vurğuladı.
Cəfər Cabbarlı ev-muzeyinin direktoru Qəmər Seyfəddinqızı Heydər Əliyevin hər bir sahəyə verdiyi xüsusi diqqətdən danışdı. O, Ulu Öndərin görkəmli şəxsiyyətlərə, mədəniyyət xadimlərinə verdiyi dəstəkdən söz açdı. Q.Seyfəddinqızı qeyd etdi ki, 15 iyun tarixi təkcə dövlətçiliyimizin xilası deyildi, bu tarix həm də Azərbaycanın bu gününü, sabahını müəyyənləşdirdi.
Tədbirdə “Mədəniyyət” jurnalının baş redaktoru, Əməkdar mədəniyyət işçisi, filologiya üzrə fəlsəfə doktoru Zöhrə Əliyeva çıxış edərək Heydər Əliyevin yenilməz iradəsi, uzaqgörənliyi, fədakarlığı onu bütün dünya azərbaycanlılarının lideri etdiyini qeyd etdi. O, Heydər Əliyevin həyatını canından artıq sevdiyi xalqına həsr etdiyini vurğuladı.
Yasamal rayon Heydər Əliyev Mərkəzinin direktoru Naminə Ömərova tədbir iştirakçılarına təşəkkürünü bildirdi. O, Heydər Əliyev fenomeninə məxsus iti zəka, müdriklik, uzaqgörənlik və əzmkarlığın ona əvəzsiz Ümummilli Lider mövqeyi qazandırdığını qeyd etdi. N.Ömərova Milli Qurtuluş Gününün xalqımızın yaddaşına mühüm tarixi gün kimi həkk olunduğunu vurğuladı.
Tədbirin bədii hissəsində tarzən Ozal Məmmədxanlı, kamança ifaçısı Elşən Qəribovun müşayiətilə xanəndə, Beynəlxalq müsabiqələr laureatı Maya Cəbrayılova “Bağrıyam” və “Mahur” təsnifini, gənc muğam ifaçılarI İlham Ələkbərzadə və Xəlifə Osmanova “Mehriban olaq”, “Azərbaycan” mahnlarını ifa etdilər. Yasamal rayon MKS-nin direktoru Lətifə Məmmədova tədbirdə iştirak edən incəsənət ustalarına fəxri fərmanlar təqdim etdi.
Tədbirdə kitabxananın Milli Qurtuluş Gününün 30 illiyinə hazırladığı videoçarx da nümayiş edildi.
Tədbir iştirakçıları Yasamal rayon Heydər Əliyev Mərkəzindəki muzeyi və Ulu Öndərin abidəsini ziyarət etdilər.
