Tokio, 05 aprel, /AJMEDIA/
SOCAR-ın Bakı Ali Neft Məktəbinin (BANM) rektoru Elmar Qasımov Universitetlərarası Azərbaycan çempionatının qalibi olan BANM-ın “Stonks” komandası ilə görüşüb.
Universitetdən AJMEDIA-ya bildirilib ki, komanda “Nə? Harada? Nə zaman?” intellektual oyununda bütün rəqiblərini geridə qoyaraq çempion titulunu qazanıb.
Rektor tələbələri təbrik edərək bu uğuru BANM üçün böyük nailiyyət adlandırıb. O, tələbələrin intellektual inkişafının vacibliyini vurğulayıb və ali məktəbin onlara daim dəstək verdiyini bildirib.
Qalib komandanın üzvləri: Xaqani Zeynallı – İnformasiya təhlükəsizliyi, III kurs, Yusif Hüseynzadə – Proseslərin avtomatlaşdırılması mühəndisliyi, V kurs, Elmar Yusifov – MBA, II kurs
Sahil Talıbov – Kimya mühəndisliyi, V kurs, Nasir Əsədzadə – Kimya mühəndisliyi, V kurs, Həsən Abbaslı – Proseslərin avtomatlaşdırılması mühəndisliyi, IV kurs.
Xatırladaq ki, çempionatda 6 region və paytaxtdan 25 ali təhsil müəssisəsinin 32 komandası iştirak edib.
Yarış Elm və Təhsil Nazirliyi, Gənclər Fondu, “Bir Könüllü” Tələbələrin Əməkdaşlığı İctimai Birliyi, “3 sual” intellektual oyunlar platforması və Azərbaycan Tələbə Gənclər Təşkilatları İttifaqının birgə təşkilatçılığı ilə keçirilib.
