Tokio, 23 iyun , /AJMEDIA/
Azərbaycanın Latviyadakı səfiri Elnur Sultanov Latviyanın iqtisadiyyat naziri İlze İndrikson ilə görüşüb.
Səfirlikdən AJMEDIA-ya bildirilib ki, görüşdə Azərbaycanla Latviya arasında mövcud olan strateji tərəfdaşlıq münasibətləri çərçivəsində iqtisadi, ticari, investisiya, nəqliyyat, logistika və digər sahələrdə əməkdaşlıq məsələləri müzakirə edilib.
Nazir İlze İndrikson ölkəsinin Azərbaycanla vacib tərəfdaş kimi iqtisadi və ticari əlaqələrin inkişafına marağını ifadə edərək, Azərbaycan Respublikası Hökuməti və Latviya Respublikası Hökuməti arasında iqtisadi, elmi-texniki və mədəni əməkdaşlıq üzrə Hökumətlərarası Komissiyanın fəaliyyətinin əhəmiyyətini vurğulayıb.
Səfir Elnur Sultanov iki ölkə arasında iqtisadi-ticari sahədə müşahidə edilən dinamikliyin və həyata keçirilən qarşılıqlı səfərlərin əhəmiyyətini qeyd edib. O, Azərbaycanla Latviya arasında iqtisadi-ticari əlaqələrin genişləndirilməsi üçün potensialın olduğunu diqqətə çatdırıb. Azərbaycanın sürətli iqtisadi inkişafı, iqtisadiyyatının uğurlu şaxələndirilməsi və Azərbaycanın aparıcı rolu ilə həyata keçirilən mühüm regional layihələr haqqında məlumat verib.
Görüşdə konkret sahələr üzrə əməkdaşlıq perspektivlərindən danışılıb və bununla əlaqədar, birgə səylərin artırılmasının vacibliyi qeyd olunub.
