Tokio, 10 sentyabr , /AJMEDIA/
Futzal üzrə Azərbaycan milli komandasının dünya çempionatının əsas mərhələsinin qrup oyunlarına hazırlıq məqsədi ilə sentyabrın 12-dən 16-dək Bakıda, 16-dan 20-dək isə Qazaxıstanın Aktau şəhərində təlim-məşq toplanışı olacaq.
AJMEDIA xəbər verir ki, millimiz təlim-məşq toplanışı çərçivəsində sentyabrın 19-da və 20-də səfərdə Qazaxıstan yığması ilə iki yoldaşlıq oyunu keçirəcək.
Oyunlar Aktau şəhərindəki “Halyk Arena”da keçiriləcək və yerli vaxtla saat 17:00-da (Bakı vaxtı ilə 16:00) başlayacaq.
Millimizin hazırlıq prosesinə Rövşən Hüseynli, Ramiz Çovdarov (hər ikisi “Araz-Naxçıvan”), Emin Kürdov (“Neftçi”), Cohnatas Felipe, Xəzər Ağalızadə (hər ikisi “Araz-Naxçıvan”), Amir Shojaei, Hadi Ahmadi (hər ikisi “Bayterek”, Qazaxıstan), Eduardo Borges (“Halle-Gooik”, Belçika), Rafael Vilela (“Kayrat”, Qazaxıstan), Everton Cardoso (“Bintang Timur”, İndoneziya), Oktay Rüstəmli (“Araz-Naxçıvan”), Sezar De Angelis Zhonatan (“Ayat”, Qazaxıstan) və Nurlan Mehdizadə (“Neftçi”) dəvət olunublar.
Qeyd edək ki, Sezar De Angelis Zhonatan, Amir Shojaei və Hadi Ahmadi komandaya Qazaxıstanda qoşulacaqlar.