Tokio, 24 mart, /AJMEDIA/
Novruz bayramı Avstraliyanın Sidney şəhərində yaşayan soydaşlarımız tərəfindən “Narin” restoranında qeyd edilib.
Bu barədə AJMEDIA-ya Avstraliya-Azərbaycan Assosiasiyasının sədri Mikayıl bəy Oyta məlumat verib. Mikayıl bəyin bildirdiyinə görə tədbirdə Sidneydə yaşayan soydaşlarımızla yanaşı, Anadolu Türkləri Təşkilatının, Tatar Assosiasiyasının üzvləri, Şimali Kıprızın Sidneydəki fəxri konsulu və Şimali Kıprız Assosiasiyasının prezidenti, Sidney Texnologiya Universitetinin professoru Şəmsəddin Nicat, Avstraliya Maarif Məktəbinin sabiq direktoru Necim Uzun, Şimal Kıprızdan gəlmiş sənətçi Abdullah Öztoprak iştirak ediblər.
Tədbiri giriş sözü ilə açan Mikayıl bəy qonaqları salamlayaraq onları Novruz bayramı münasibətilə təbrik edib. Təbiətin oyanışı ilə əlaqədar keçirilən Bahar bayramının birlik, həmrəylik, dostluq və səmimiyyət kimi xoş məziyyətləri özündə birləşdirməsindən geniş danışıb. Qeyd edib ki, bu bayram məhz Azərbaycan Respublikasının təşəbbüsü ilə UNESCO-nun Qeyri-Maddi Mədəni İrs siyahısına daxil edilib. Sonra qonaqlar musiqi sədaları altında milli rəqslərimizi ifa ediblər. Uşaqlar Azərbaycan, Vətən və Novruz haqda şeirlər söyləyiblər. Novruz atributları ilə bəzədilmiş sərgi və milli yeməklər, şirniyyatlar qonaqlar tərəfindən maraqla qarşılanıb. Milli musiqi sədaları altında rəqs edən iştirakçılar şənlənərək xatirə fotoları çəkdiriblər.
Tədbirdə Avstraliyanın Yeni Cənubi Uels (NSW) ştatının Multikulturalizm Məsələləri üzrə Nazirliyinin Novruz bayramı ilə əlaqədar Assosiasiyaya ünvanlandığı məktub da səsləndirilib. Məktubun mətnində Baharın gəlişi ilə əlaqədar soydaşlarımıza təbriklər və xoş arzular çatdırılıb.
