Mixail Qusman: Qalibiyyətli müharibə nəticəsində ali ədalət zəfər çaldı

Tokio, 6 sentyabr , /AJMEDIA/

Şuşa, əlbəttə, rəmzi məna daşıyan şəhərdir. Sovet dövründə bu, bir simvol idi. Biz tamamilə haqlı olaraq onu mədəniyyət paytaxtı adlandırırdıq. Azərbaycanda doğulanlarla müqayisə edilə biləcək yazıçıları, rəssamları, bəstəkarları olan hər xalqın, hər ölkənin buna görə öyünməyə haqqı var. Bu, obyektiv həqiqətdir. Əhalisinin 95 faizi azərbaycanlılar olan Şuşanın işğalından daha böyük ədalətsizlik ola bilməzdi. Bu ədalətsizlik 30 il ərzində qəlbimizdə qubar bağlayırdı.
AJMEDIA xəbər verir ki, Rusiyanın TASS İnformasiya Agentliyinin baş direktorunun birinci müavini Mixail Qusman bu fikirləri “Real” telekanalına müsahibəsində söyləyib.
Həmvətənimiz olan məşhur rusiyalı jurnalist deyib: “Mənə ötən il Şuşada keçirilmiş “Xarıbülbül” Festivalında iştirak etmək xoşbəxtliyi nəsib olub. Ali ədalət zəfər çaldı. Orada biz hamımız sevincimizdən ağlayırdıq. Bu, daxildən gələn bir hiss idi. Bu gün Şuşa yeni görkəm alır. O vaxtdan bir il keçib və artıq üçüncü dəfə Şuşada olmuşam. İkinci dəfə Dünya Azərbaycanlılarının Qurultayında, üçüncü dəfə Mediaforumda. Yeni, dirçələn Şuşanın siması artıq görünür”.
Mixail Qusman Bakıya sevgisini bu sözlərlə ifadə edib: “Mən doğma şəhərim Bakını hədsiz sevirəm, Azərbaycan mənim tanrımdır. Mən Bakıda doğulmuşam, ömrüm boyu özümü bakılı adlandırmışam, 30 il Moskvada yaşamağıma baxmayaraq özümü moskvalı adlandırmamışam”.
Azərbaycanın ən yeni tarixində ən çətin illər haqqında sualın cavabında o bildirib ki, ən ağır illər belə adlandırılan Xalq Cəbhəsinin hakimiyyəti illəri olub. Çünki bu, Qarabağda separatçı hərəkatın başlanması ilə eyni vaxta düşüb: “Yadımdadır, Bakıda hərbi vəziyyətin tətbiq edilməsi dəhşətli idi. Mənə elə gəlirdi ki, Azərbaycan uçurum həddindədir. Xalqın faktiki olaraq ölkəni xilas etməyə çağırdığı Heydər Əliyevin siyasi dühası, siyasi iradəsi, siyasi qüdrəti olmasaydı, bəlkə də bu gün sizinlə söhbət edə bilməzdik. Ola bilsin danışardıq, amma Azərbaycan bu gün olduğu kimi azad, müstəqil və güclü olmazdı”.
Uzun illər Moskvada yaşamasına baxmayaraq, ənənəvi Azərbaycan dəyərlərinin ondan ötrü əhəmiyyətli olaraq qaldığını vurğulayan M.Qusman deyib: “Mən dostluq deyəndə bakısayağı dostluğu başa düşürəm. Moskvasayağı dostluq bir qədər fərqlidir. Mən dostluq anlayışını çox yüksək qiymətləndirirəm. Hesab edirəm ki, dostların sayı az olsa da, onlar elə adamlar olmalıdırlar ki, sən onlara inanırsan, onlar da sənə inanır”.
Rusiya jurnalistikasının ağsaqqalı “Hakimiyyət formulu” proqramı üzərində işin spesifikliyi, bu verilişin qəhrəmanları olan dünya liderləri barədə danışaraq deyib: “Hakimiyyət formulu” – daha çox televiziya portretidir. Bu, ya ölkə fonunda qəhrəmanın portreti, ya da bəzən baş qəhrəman vasitəsilə ölkə haqqında söhbətdir. Mən iki dəfə Prezident Obama ilə, Prezident Qəddafi ilə müsahibə hazırlamaq şərəfinə nail olmuşam. Qəddafi ağır energetikalı insan idi, onunla müsahibəm çox çətin oldu. Obama söhbət üçün maraqlı adamdır. Ona görə ki, tamamilə adi ailədən olan bu sadə oğlan hakimiyyətin ən yüksək zirvəsinə çatanda onun qəlbində baş verənləri təsəvvür edə bilirdim. Mən ondan müsahibə götürəndən bir qədər əvvəl o, Senatın nümayəndə heyəti ilə birlikdə Bakıda olmuşdu. Sonradan biz Ağ evin dəhlizində kamera önündə, amma səssiz çəkiliş aparanda o, Bakıya səfərini xatırlayırdı. Görünür, mənim əslən bakılı olduğumu ona demişdilər. O, Bakını, Prezident İlham Əliyevlə görüşlərini xatırlayırdı. Səfərdən çox məmnun idi.
Mən öz müsahibimlə söhbət zamanı kəskin məqamlardan qaçmağa və ya onun xoşuna gəlməyə çalışmıram, digər tərəfdən xoşagəlməz suallar verməyi öz vəzifəm hesab etmirəm. Əgər siz maksimum parlaq, tamdəyərli portret çəkirsinizsə, ağıllı tamaşaçı bu şəxsin kim olmasını özü təyin edəcək. Təhrikedici suallar verməklə tamaşaçıya kömək göstərməyə çalışmaq lazım deyil”.
Mixail Qusman Azərbaycan xalqının ümummilli lideri Heydər Əliyev və Prezident İlham Əliyev ilə müsahibələri barədə danışarkən deyib: “Mən öz müsahiblərimə tez-tez belə sual verirdim: “Hakimiyyət formulu nədir?” Rəhmətlik Heydər Əliyevdən müsahibə götürmək şərəfinə nail olmuşam. Bu, nadir hadisə idi. O, mənə yarım saat vaxt ayırmışdı, amma faktiki olaraq təqribən iki saat kamera qarşısında söhbət etdik. Mən soruşdum: “Sizin fikrinizcə hakimiyyət nədir, onun dadı-ləzzəti necədir?” O, əvvəlcə ciddiləşdi, bir qədər pauzadan sonra “acıdır” dedi, sonra isə ürəkdən güldü.
İlham Əliyev məsuliyyət barədə və xalqın sənə göstərdiyi etimada layiq olmağın zəruriliyi barədə suala çox dəqiq cavab verdi. Prezident İlham Heydər oğlu ilə üç dəfə söhbət etmək şərəfinə nail olmuşam. Bu müsahibələrlə çox fəxr edirəm”.

Follow us on social

Facebook Twitter Youtube

Related Posts