Tokio, 13 may, /AJMEDIA/
Daşkənddə “KazMunayQaz” SC-nin İdarə Heyətinin sədri Asxat Xasenov və “Uzbekneftegaz” SC-nin İdarə Heyətinin sədri Bahodirjon Sidikov arasında işgüzar görüş keçirilib. Görüş zamanı geoloji kəşfiyyat layihələrinin həyata keçirilməsi planları müzakirə edilib.
AJMEDIA “KazMunayQaz”ın mətbuat xidmətinə istinadla xəbər verir ki, görüşün mövzusu, həmçinin 2025-ci il martın 5-də Azərbaycanın SOCAR, Qazaxıstanın “KazMunayQaz” SC, Tatarıstanın “Tatneft” PJSC və Özbəkistanın “Uzbekneftegaz” ASC arasında rəqəmsal texnologiyalar və sənaye təhlükəsizliyi sahəsində əməkdaşlıq haqqında memorandumların müddəalarının həyata keçirilməsi üzrə gələcək addımlar olub.
Xatırladaq ki, bu ilin mart ayında SOCAR, “KazMunayQaz” SC, PJSC “Tatneft” və “Uzbekneftegaz” ASC-nin nümayəndələri “Rəqəmsal texnologiyalar və sənaye təhlükəsizliyi” sahəsində dördtərəfli əməkdaşlıq memorandumları imzalayıblar. Sənədlər rəqəmsal həllərin hazırlanması və tətbiqi sahəsində təcrübə mübadiləsini, o cümlədən texnogen xarakterli fövqəladə halların qarşısının alınması və nəticələrinin aradan qaldırılması üzrə tədbirlərin həyata keçirilməsini nəzərdə tutur.
