Akira Matsunaqa: Əminəm ki, Vətən müharibəsində böyük Zəfər qazanan Azərbaycan dağıdılmış əraziləri də tezliklə bərpa edəcəkdir

Tokio, 6 Noyabr, /AJMEDIA/

Əminəm ki, Vətən müharibəsində böyük Zəfər qazanan Azərbaycan dağıdılmış əraziləri də tezliklə bərpa edəcək, həmin torpaqlarda ən müasir şəhər və kəndlər salınacaqdır.

Bu sözləri AJMEDIA-ya müsahibəsində Tokio Sahibkarlığın Tədqiqi İnstitutunun professoru, “ajmedia.jp” saytının baş redaktoru Akira Matsunaqa deyib. Prezident, Ali Baş Komandan İlham Əliyevin rəhbərliyi altında qəhrəman Azərbaycan Ordusunun 1990-cı illərin əvvəllərində Ermənistan tərəfindən işğal edilən torpaqları azad etməsini möhtəşəm hadisə adlandıran yapon professor bu münasibətlə Azərbaycan xalqına təbriklərini də çatdırıb. Bildirib ki, həmin ərazilər Azərbaycan rəhbərliyinin dəmir iradəsi və Silahlı Qüvvələrin böyük qəhrəmanlığı və şücaəti nəticəsində həqiqi sahiblərinə qaytarılıb. Azərbaycan xalqının bu qələbəyə sarsılmaz inamı nəticəsində tarixi ədalət bərpa edilib.

Azərbaycanın cəmi 44 gün davam edən döyüşlər nəticəsində qələbə qazanmasının səbəblərinə toxunan A.Matsunaqa vurğulayıb ki, bunun əsasında ilk növbədə Azərbaycan xalqının Prezident, Ali Baş Komandan İlham Əliyevə inamı dayanır. Yapon professor bildirib ki, Azərbaycan rəhbərliyi uzun müddət səbir və təmkin nümayiş etdirərək, torpaqları qan tökülmədən, danışıqlar yolu ilə qaytarmağa çalışıb. Bununla yanaşı, ölkə iqtisadiyyatını inkişaf etdirərək müasir ordu quruculuğuna nail olub. Nəticədə Azərbaycanda düşməni həm say, həm keyfiyyət və həm də peşəkarlığı ilə üstələyən ən müasir ordu yaradılıb. Hər bir Azərbaycan əsgəri Vətəninə və məxsus olduğu xalqa sonsuz məhəbbət ruhunda tərbiyə edilib. Bunu döyüşlər zamanı Azərbaycan əsgərlərinin nümayiş etdirdiyi qəhrəmanlıqlar da təsdiq edir.

Ermənistanın məğlubiyyətinin səbəblərinə gəlincə isə, professor bunun əsasında özündən razılığın, Azərbaycan Ordusunun gücünün lazımınca qiymətləndirilməməsinin dayandığını bildirib.

A.Matsunaqa Dağlıq Qarabağın tarixi Azərbaycan ərazisi olduğunu vurğulayaraq, bunu ermənilərin işğal etdikləri əraziləri tərk edərkən həmin yerlərdə törətdiyi vandalizm aktlarının təsdiq etdiyini də diqqətə çatdırıb. Bildirib ki, ermənilər həmin əraziləri tərk edərkən həm yaşayış məntəqələrini, həm dini və tarixi abidələri və həm də azərbaycanlılara məxsus qəbirstanlıqları belə dağıtmaqdan çəkinməyiblər. Bu, yalnız azərbaycanlılara qarşı deyil, bütün insanlığa qarşı törədilmiş ən ağır vandalizm aktıdır.

Professor vurğulayıb ki, bəzi ermənipərəst kütləvi-informasiya vasitələrinin ermənilərə haqq qazandırmaq cəhdlərinə baxmayaraq, bütün dünya onların əsil üzünü gördü. Bunu dağıdılmış və viran qoyulmuş yaşayış məskənlərinin beynəlxalq KİV-lər tərəfindən yayılan görüntüləri bir daha bütün dünyaya göstərdi.

Vətən müharibəsində Azərbaycanın möhtəşəm qələbəsinin regionun inkişafına və çiçəklənməsinə mühüm təsir göstərəcəyinə inandığını bildirən yapon professor qeyd edib ki, ilk növbədə doğma evlərini tərk edən məcburi köçkünlər öz yaşayış məntəqələrinə dönəcəklər. Xarabalığa çevrilmiş kənd və şəhərlər yenidən bərpa olunacaq, bu ərazilərə yeni həyat qayıdacaq. Azərbaycan Prezidenti İlham Əliyev bu ərazilərdə ən müasir şəhər və kəndlərin salınmasına, müasir infrastrukturun yaradılmasına nail olacaq.

Yaponiyanın Azərbaycanın ərazi bütövlüyünü daim dəstəklədiyini xatırladan A.Matsunaqa bildirib ki, BMT Təhlükəsizlik Şurasının məlum qətnamələrinin qəbulunda onun ölkəsi fəal iştirak edib. Bu gün isə həmin ərazilərdə “yaşıl enerji” zonalarının, “ağıllı kənd və şəhərlərin” salınmasında yapon şirkətləri yaxından iştirak edirlər. Yapon investorlar isə Azərbaycanın inkişafını və çiçəklənməsini həmişəki kimi yaxından dəstəkləyirlər. Azərbaycanın yaxın dostu olan Yaponiya bu nəhəng bərpa və quruculuq işlərində xalqımıza uğurlar arzulayır.

Follow us on social

Facebook Twitter Youtube

Related Posts